Muhammad Ali afariki dunia.

0
440

3B94F61F-14C6-4A96-95E9-29A547034328_w987_r1_s
Bingwa wa dunia wa uzani wa juu mara tatu Mohamed Ali amefariki dunia akiwa na umri wa miaka 74.

Ali alishika ubingwa wa dunia mara tatu katika maisha yake.

Kifo chake kilithibitishwa na msemaji wa familia Bob Gunnell baada ya bingwa huyo kulazwa hospitali mapema wiki hii kutokana na matattizo ya kupumua.

Ali, alikuwa bondia mwenye machachari ambaye aliburudisha wapenzi wa ndondi duniani kwa uhodari wake, maneno makali na ya mzaha dhidi ya wapinzani wake, na uchezaji wa ndondi akichanganya spidi na uwezo wa kusema atamwangusha mpinzani wake katika raundi gani.

Tangu miaka ya kati ya 1960 Ali alikuwa mmoja wa mtu anayejulikana kuliko wote duniani, na ingawa katika miaka ya karibuni alipunguza kusafiri kuonekana kwake ilikuwa jambo lililofurahisha wengi kote duniani.

Kifo chake kimekuja baada ya kupambana muda mrefu na ugonjwa wa Parkinson, unaosababisha kutetemeka. Ali aligundulika kuwa na ugonjwa huo mwaka 1984, miaka mitatu baada ya kuacha ndondi. Alianza ndondi akiwa mtoto wa miaka 12 katika mji wa Louisville, Kentucky, baada ya kuibiwa baiskeli yake.

Amebakiza watoto tisa, ikiwa ni pamoja na binti yake Laila, ambaye kama baba yake alikuwa bingwa wa dunia katika ndondi kwa wanawake, na mke wake wa nne, Lonnie.

Katika miaka ya mwisho ya 1960 Ali ambaye alikuwa akijulikana kama Cassius Clay alibadili dini kuwa mwislamu na kuchukua jina la Muhammadi Ali, aligoma kuingia katika jeshi la Marekani kwenda vitani Vietnam, alishiriki kwa vitendo kupigania haki za raia Marekani.

Alichukua ubingwa wa dunia kwa mara ya kwanza mwaka 1964 baada ya kumpiga Sonny Liston na kuishtua ulimwengu akiwa kijana wa miaka 22 tu.

Mapambano yake katika miaka ya baadaye na bingwa mwingine maarufu Joe Frazier, ambaye pia ameshafariki, yamebaki hadi leo kuwa mapambano ya ndondi za uzito wa juu yanayokumbukwa sana.

Mwaka 1974 alimshinda George Foreman katika pambano lililofanyika Kinshasa, Zaire (wakati ule) katika pamobano ambalo linakumbukwa kuwa moja ya mapambano makali sana katika historia ya ndondi.
www.voaswahili.com

NO COMMENTS