Tulipokea habari hizo jana kwenye mtandao huu lakini tuliweka angalizo kuwa hazijathibitishwa mpaka wakati ule lakini hatimaye mwanamuziki Saida Karoli amezungumza na mtandao wa Bongo5.com akieleza kuwa yu mzima wa afya akiwa safarini kuelekea mkoani Mbeya. Baada ya kupokea simu kadhaa jana kumuulizia uhai wake. Amezungumza mwenyewe na Bongo5 kusikiliza mahojiano hayo bofya hapa. Pole Saida Karoli.

http://www.hulkshare.com/583kho49tz9c

Taasisi isiyo ya kiserikali ya OXFAM kwa kupitia Kampeni yake ya GROW imewakutanisha pamoja masupa staa saba wa Tanzania wakiwemo Mbunge wa Kawe Mh. Halima Mdee pamoja na Mbunge wa Bunge la Afrika Mashariki Mh. Shy-Rose Bhanji kufanyakazi pamoja na vikundi vya wanawake wajasiriamali na wazalishaji, kwa lengo la kuhakikisha hakuna mtanzania atakayeteseka kwa njaa wakati mbinu za kilimo zinaweza kufanikiwa.

Akizungumza wakati wa kuwatambulisha rasmi mabalozi wa OXFAM kupitia kampeni hiyo, mmoja wa mabalozi hao Bi. Khadija Mwanamboka amesema kilimo sio tu ni sekta endelevu nchini Tanzania bali pia ni Nyanja inayowezesha kupatikana kwa chakula kwa familia na akiba ya chakula kwa taifa kwa kuwa asilimia 80 ya wajasiriamali nchini ni wakulima.
Nchini Tanzania takwimu zinaonyesha kuwa zaidi ya asilimia 60 ya wajasiriamali wanawake wanajihusisha na kilimo kikiwepo cha mbogamboga na matunda.

Aidha kampeni hiyo inakusudia kuendeleza na kukuza uzalishaji utakaoyafanya mazao hayo ya kilimo kuwa na bei muafaka kwa faida ya wakulima hao wa chini na wa kati.

Mabalozi wa OXFAM katika kampeni ya GROW wakati wa hafla hiyo.

Khadija Mwanamboka – Mbunifu wa Mavazi akipozi na Tuzo yake mara baada ya kutangazwa rasmi.
Shamim Mwasha Fashion Blogger.
Dina Marious- Mtangazaji wa Redio.
Jacob Stephen Muigizaji.

Mabalozi wa OXFAM katika kampeni ya GROW katika picha ya pamoja na Naibu Mkurugenzi Mkazi OXFAM-Justin Morgan (wa pili kushoto).
Kwa hisani ya Mo Blog Team

Mkurugenzi wa Habari na Uenezi wa Chadema, John Mnyika, akizungumza na Waandishi wa Habari leo tarehe 18/06/2013 Makao Makuu ya chama hicho ambapo amesema Chadema inao ushahidi wa video kuwa aliyelipua bomu kwenye mkutano wao Arusha ni polisi na akasaidiwa na wenzake kutoroka.

Wakizungumza na Mwananchi jumatatu baada ya mechi ya kuwania nafasi ya kucheza Fainali za Kombe la Dunia, wachezaji hao wa Ivory Coast walisema kwamba Stars ni timu nzuri ila inakosa uzoefu wa kupambana na wachezaji wenye uzoefu na kiwango kikubwa kimataifa.

“Timu hii ni nzuri sana ina wachezaji wenye uwezo mkubwa sana, lakini tatizo ni kwamba hawana uzoefu, sisi tumewafunga kwa sababu ya uzoefu wetu wa kucheza mechi nyingi za kimataifa ndani na nje ya Afrika,”alisema Toure.

Alisema katika nafasi ya beki kuna mchezaji aliyevaa jezi namba tano (Kelvin Yondan) ni beki mwenye uwezo mkubwa.

Mbali na Yaya Toure Mshambuliaji mwingine wa timu hiyo ya Ivory Coast, Gervais Gervinho alisema kwamba Taifa Stars ilicheza mpira mzuri kuliko wao na aliwapa nafasi kubwa ya kushinda hasa baada ya Thomas Ulimwengu kusawazisha bao la pili.

“Kama tusingekuwa makini na kutumia uzoefu wetu wote Tanzania wangetufunga kwa sababu baada ya yule mchezaji aliyevaa jezi namba 11 (Thomas Ulimwengu) kufunga bao la pili tulichanganyikiwa na kuamini kwamba tusipotumia uzoefu na juhudi binafsi hatuwezi kushinda mechi,”alisema Gervinho ambaye ni mshambuliaji wa klabu ya Arsenal.

Naye mshambuliaji mwingine wa Ivory Coast anayechezea Lille, Solomon Kalou alisema,“Mchezaji aliyevaa jezi namba 10 (Mbwana Samatta) ana uwezo mkubwa sana kwanza anaweza kukaa na mpira, mshambuliaji anayekaa na mpira hauwezi kumkaba.
Chanzo:Mwananchi.

Wabunge wanne wa Chadema, Said Arfi (Mpanda Mjini), Tundu Lissu (Singida Mashariki), Mustapha Akunaay (Mbulu) na Joyce Mukya (Viti Maalumu) wamekamatwa wakituhumiwa kuhusika na mkusanyiko usio halali kwenye Uwanja wa Soweto jumanne.

Mkuu wa Operesheni wa Polisi, Kamishna Paul Chagonja alisema jumanne kwamba pamoja na wabunge hao pia wamewakamata watu wapatao 60 kutokana na vurugu zilizozuka jumanne baada ya Polisi kuwatawanya kwenye uwanja huo waliokuwa wamekusanyika kuomboleza vifo vya watu watatu; Judith Moshi, Ramadhan Juma na Amir Ally waliofariki kwenye mlipuko wa bomu uliotokea kwenye uwanja huohuo, Jumamosi iliyopita.

Mbali ya viongozi hao, alisema wanawasaka Mwenyekiti wa Chadema, Freeman Mbowe na Mbunge wa Arusha Mjini, Godbless Lema.

“Tunawasaka wabunge ili tuwajumuishe na watu hawa kwa kosa la kuhusika na mkusanyiko usiokuwa halali. Hadi sasa tumefanikiwa kulinasa gari la Mbowe,” alisema Chagonja.

Pia kamatakamata hiyo imemkumba Mpigapicha wa Kituo cha Televisheni cha Channel Ten, Ashraf Bakari. Polisi walilazimika kutumia nguvu kuwatawanya waombolezaji hao.

Awali, Kamishna Chagonja alisema jana asubuhi kuwa wamelazimika kuzuia viwanja hivyo kutumika baada ya wamiliki wake, AICC kuzuia shughuli za Chadema kwenye eneo lao.

Kamishna Chagonja aliwaonyesha waandishi wa habari barua aliyosema imeandikwa na uongozi wa AICC kuzua Chadema kuendelea kuutumia Uwanja wa Soweto.

Mabomu yarindima

Dalili za kuzuka kwa vurugu zilianza kuonekana asubuhi baada ya polisi kuzingira uwanja huo na kuzuia watu waliokuwa wameanza kufurika katika eneo hilo kuanzia saa moja kuingia kwa ajili ya maombolezo.

Wakati Polisi wakiwa uwanjani, wananchi walijaa nje ya uwanja na kuonekana kama wamewazingira.

Viongozi wa Chadema wakiongozwa na Mbowe waliwasili uwanja hapo yapata saa nane mchana na kukuta zuio hilo na kuanza kuzungumza na wananchi ingawa FFU walikuwa wakiwataka watu kutawanyika. Mabomu yalianza kurindima wakati Arfi aliposimama na kuwahimiza wananchi kuelekea Hospitali ya Mount Meru kwa ajili ya kuaga miili ya marehemu.

“Tuna muda mfupi sana wa kuzungumza hapa, tunaomba wote tuelekee Hospitali ya Mount Meru kuaga miili ya marehemu kwa sababu uwanja huu umezuiwa na polisi,” alisema Arfi kabla ya kukatishwa na milipuko ya mabomu.

Awali, Lissu ambaye pia ni Mwanasheria wa Chadema alitoa msimamo wa chama hicho kuwa Mwenyekiti wao, Mbowe na Lema hawatatoa ushahidi wa tukio la bomu wala kujisalimisha polisi kwa sababu hawana imani na jeshi hilo.

“Namtaka Chagonja atangulie mahakamani, tutakutana hukohuko. Mbowe na Lema hawatatoa ushahidi wala kujisalimisha polisi…” alisema Lissu na kuongeza:

“Kisheria haiwezekani polisi ambao ndiyo watuhumiwa ndiyo wadai kukabidhiwa ushahidi ili wauharibu.”

Mapema Kamishna Chagonja aliwataka Mbowe na Lema kutoa ushahidi wa polisi kuhusika na tukio la kurusha bomu kwenye mkutano wa Chadema la sivyo polisi watatumia sheria kuwalazimisha kufanya hivyo.

Hekaheka

Baada ya polisi kuanza kutupa mabomu saa 8.45 mchana, wabunge, viongozi waandamizi wa Chadema na watu waliokuwa wamekusanyika walilazimika kutimua mbio.

Watu walioshuhudia tukio lile wanasema viongozi hao akiwamo Mbowe na mwenzake Lissu walikimbilia kwenye magari yao. Lema alilazimika kukimbilia kwa wachoma nyama ya nguruwe, (kitimoto) kwenye maeneo ya Kaloleni.

Kabla ya polisi kurusha bomu mahali alipokuwapo Lema, mbunge huyo alisikika akisema:

“Jaribuni kuvumilia, tunajaribu kuwasiliana Serikali ya Mkoa, ili watupe kibali cha kuleta miili ya wapendwa wetu hapa, kuweni wastaarabu kwa sababu mbele yetu kuna wana usalama ambao wanalinda amani, ingawa kufa ni kufa tu, wenzetu wameshakufa na sisi ipo siku tutakufa, lakini kila anayetangulia lazima tumzike kwa heshima zote.”

Kauli hiyo iliwachefua polisi ambao walishatangaza amri ya watu kutawanyika katika viwanja hivyo na kwamba hakutakuwa na suala la kuaga miili ya watu hao katika eneo hilo. Ghasia hizo zilisababisha kusimama kwa shughuli za biashara na kijamii kwa muda jijini Arusha huku watu waliokuwa katika nyumba zilizokuwa karibu na maeneo yalikorushwa mabomu wakilazimika kutoka nje kupata hewa safi baada ya nyumba hizo kujaa hewa ya mabomu.

Polisi waliokuwa wakirusha mabomu waliwakimbiza wananchi hadi maeneo ya Sakina huku wakiendelea kufyatua mabomu kila walipoona mkusanyiko wa watu.

Katika eneo la Kaloleni, mkabala na Ofisi ya Mtendaji wa Kata hiyo baadhi ya wafuasi wa Chadema walichoma matairi barabarani na kusababisha ifungwe. Pia walichoma matairi katika eneo la Mianzini.
Katika eneo la Tanki la Maji, Barabara ya kwenda Moshi, baadhi ya wafuasi wa Chadema walipanga mawe barabarani na kusababisha msongamano wa magari.

Katikati ya jijini Arusha barabara zilikuwa hazipitiki kutokana na nyingine kufungwa na kusababisha usumbufu mkubwa.

Waandishi nao matatani

Katika vurugu hizo, baadhi ya waandishi wa habari walishambuliwa na polisi. Hao ni pamoja na Mwandishi Mwandamizi wa Gazeti dada la The Citizen, Zephania Ubwani ambaye kabla ya kuchomoka katika mikono ya askari, alikuwa akiwaonyesha kitambulisho chake cha kazi.

Hata hivyo, askari hao walimtishia kumtandika na kisha kumwambia aondoke katika eneo hilo kwa kuwa haijalishi yeye ni nani.

Mwingine ni mwandishi wa gazeti la Nipashe, Cnythia Mwilolezi ambaye alilazimika kuacha viatu na vitendea kazi vyake katika Uwanja wa Soweto na kukimbilia kwenye moja ya nyumba zilizopo jirani na eneo la tukio.

Katibu Msaidizi wa Klabu ya Waandishi wa Habari Mkoa wa Arusha, Moses Kilyinga alipigwa na polisi baada ya kuonekana akichukua maelezo.

Kilyinga ambaye alishambuliwa na askari hao alisema mara baada ya askari hao kumkamata, alijitambulisha lakini hawakumwelewa na wakaendelea kumchapa kabla ya kufanikiwa kuchomoka.

Polisi wavamia hospitali

Wakati baadhi ya majeruhi wakidai kushuhudia polisi wakiwapiga risasi watu waliokuwa wakimkimbiza mtu aliyerusha bomu katika tukio la Jumamosi, askari hao juzi walifika katika Hospitali ya Seliani saa mbili usiku wakitaka kumchukua mmoja wa majeruhi kwa mahojiano kuhusiana na tukio hilo. Hata hivyo, hawakufanikiwa baada ya mgonjwa kutokomea kusikojulikana baada ya kupata taarifa za kutaka kuhusishwa na tukio hilo.

Ingawa si polisi wala Chadema waliokuwa tayari kumtaja mgonjwa huyo, inaelezwa kwamba majeruhi anayesakwa ni Abdallah Alila aliyekaririwa na vyombo vya habari jana na juzi akidai kumshuhudia aliyerusha boma akiondoka kwenye moja ya magari ya polisi.

Hata hivyo, Kamishna Chagonja jana alisema kwamba jeshi lake linapenda kushirikiana na raia kupata taarifa na si kutumia nguvu katika kukusanya ushahidi wake.
Chanzo:Mwananchi.

Katika hali ya kutoeleweka nani hasa anahusika na mabomu ya Arusha, na nini Polisi wanakifanya jeshi hilo sasa linaanza kuwashukia viongozi wa vyama vya siasa ambao wamekuwa wakitupiana lawama kuhusu nani anahusika na mashambulizi hayo.

Tuungane na Mwananchi kwa uchunguzi juu ya hili.

Jeshi la Polisi limetishia kuwakamata Mwenyekiti wa Chadema, Freeman Mbowe na Mbunge wa Arusha Mjini, Godbless Lema na limesema litamhoji Katibu Mwenezi wa CCM, Nape Nnauye baada ya wanasiasa hao kudai kufahamu watu waliohusika na tukio la kurushwa bomu mwishoni mwa wiki iliyopita.

Kamishna Chagonja alikataa kutaja majina ya watuhumiwa akidai kwa kufanya hivyo kunaweza kuharibu upelelezi.

Polisi wajitetea kurusha risasi

Akizungumzia madai ya polisi kutumia risasi za moto katika tukio hilo, Kamishna Chagonja alisema walilazimika kupiga mabomu na kurusha risasi hizo ili kuwadhibiti wafuasi wa Chadema waliokuwa wakiwazuia kumkamata mtuhumiwa.

Hata hivyo, Mtoto Abubakar Adam, mwenye umri wa miaka kumi na moja, ambaye ni mmoja wa majeruhi waliolazwa katika Hospitali ya Selian alikaririwa na gazeti hili jana akiwatuhumu polisi kumpiga risasi.

Kamishna Chagonja alisema: “Baada ya bomu kurushwa na kulipuka, polisi walianza kukimbilia eneo la tukio lakini vijana wa Chadema wakaanza kuwashambulia polisi ambao walilazimika kujihami.”

Tendwa awaonya Mbowe na Nape

Msajili wa Vyama vya Siasa, John Tendwa amewataka viongozi wa Chadema na CCM kuwasilisha ushahidi wa taarifa zao za madai ya kuwafahamu watu waliohusika na tukio hilo ili waweze kuchukuliwa hatua za kisheria.

Kauli ya Tendwa imekuja baada ya Nape kudai kumkariri Lema akisema kuwa uchaguzi hauwezi kufanyika, huku Mbowe akidai kuwa wana ushahidi wa CD ambao umemwonyesha askari polisi wa Kikosi cha Kutuliza Ghasia (FFU) kuhusika na tukio la urushaji wa bomu kwenye mkutano huo wa chama chake na kusababisha watu watatu kufariki dunia na wengine kujeruhiwa.

Akizungumza na waandishi wa habari Dar es Salaam jana, Tendwa alisema kauli za viongozi hao zinawachanganya wananchi.

Alisema kitendo cha kunyoosheana vidole bila ya kutoa ushahidi ni kutafuta umaarufu usio na faida, jambo ambalo linaweza kuongeza chuki na hasira.

Chanzo: Mwananchi.